تخطَّ إلى المحتوى
متجري
0 0
متجري · قصتنا

مش مجرد مشروع… هاي حكاية حلم ما مات

كل إشي بلّش بحلم صغير سنة 2016… وحكاية لسه مستمرة.

2016سنة بداية الحلم20قطعة أول انتصار — انباعت كلها2أخوين بإيد وحدة3أشهر لأول علامة عناية خاصة
البداية · 2016

كل إشي بلّش بحلم صغير

في سنة 2016، ما كان في مسفلورا بالشكل اللي بتشوفوه اليوم، ولا كان في ماكينات متطورة، ولا مكان شغل مجهز، ولا حتى فريق عمل.

كان في شاب اسمه شريف، عنده حلم أكبر من الإمكانيات اللي كانت بين إيديه. وقتها كان يشتغل في منجرة، بوظيفة سائق ومشغّل ماكينة CNC. كان يرجع من شغله تعبان ومهلوك، بس رغم كل التعب، كان في إشي ثاني بباله ما كان يقدر يتخلى عنه: حلمه إنه يكون عنده مشروعه الخاص في عالم الطباعة والهدايا.

بلّش بصفحة صغيرة على الإنترنت، وكان يبيع منتجات جاهزة. يجيب القطعة، يغلفها، ويجهزها للزبون. ما كان عنده ماكينات طباعة، ولا معدات، ولا حتى مكان مخصص للشغل — كل اللي كان عنده طابعة صغيرة قديمة، ورفّين داخل خزانة!

والطلبات؟ كانت قليلة لدرجة إنه ممكن نعدّ زباينه على أصابع الإيد. بس اللي ما كان قليل أبدًا هو شغفه.

كان عنده حب غريب لكل تفصيلة صغيرة، وكان مؤمن إنه ممكن يطلع من هالبداية البسيطة إشي كبير.
نقطة التحوّل

أول مرة حسّينا إنه الحلم ممكن يصير حقيقة

وبينما كان شريف يحاول يطوّر مشروعه، طلع ترند لعبة Pokémon، وقرر يجرب فكرة جديدة: بلايز مطبوعة عليها شخصيات بيكمون. طبع 20 بلوزة فقط، ونزل يعرضهم على الصفحة.

واللي صار بعدها كان نقطة تحوّل صغيرة، بس أثرها كان كبير جدًا بالنسبة إله: العشرين قطعة انباعوا كلهم!

يمكن بالنسبة لغيره كان رقم بسيط، بس بالنسبة لشخص كان بالكاد يبيع كم قطعة بالشهر، كانت هاي لحظة بتعطيه ألف سبب يكمل.

ومن هون زاد الحماس، وصار يتعلم ويجرب ويطوّر من حاله، بين وظيفته ومشروعه الجانبي. ما كان عنده تعليم جامعي متخصص، لكنه كان عنده فضول كبير. يحب يتعلم، يجرب، يغلط، يخرب، ويرجع يحاول لحد ما يوصل للنتيجة اللي بباله.

الأخوة

من أخ لأخ… ومن حلم فردي لحلم مشترك

خلال هاي الفترة، كان أخوه الأصغر محمد يكبر، ويمر بمرحلة من التخبط والبحث عن الطريق المناسب إله.

شريف شاف فيه إشي، وقرر يشجعه يدخل عالم الإنترنت والكمبيوتر، ويكتشف الفرص الموجودة فيه.

وبالفعل، محمد بلّش يدخل هالعالم، ومع الوقت صار عنده نفس الشغف تقريبًا. أخذ كورسات وتعلم المونتاج، والتصوير، والتصميم، وصناعة المحتوى، وأشياء كثيرة ثانية.

كان شريف هو اللي فتحله الباب، ومحمد بلّش يرسم طريقه الخاص.

التوقف

الحياة مش دايمًا بتمشي زي ما بنخطط

مرت الأيام، وصارت مسؤوليات الشغل والحياة أكبر، خصوصًا مع ظروف العمل والزواج، وما قدر شريف يكمل بالمشروع بالشكل اللي كان يتمناه.

وبعد فترة، توقفت مسيرة المشروع، وكل واحد فيهم كمل حياته وتجربته الخاصة؛ مرة نجاح، ومرة فشل، ومرة بداية جديدة.

لكن في حلم ظل موجود، حتى لو اختفى عن عيون الناس.
العودة · 2025

لما قررنا نرجع من جديد

مرت السنوات، لحد ما وصلنا لسنة 2025. ظروف الحياة تغيّرت، وتركنا شغلنا، وصار قدامنا سؤال كبير: شو الخطوة الجاية؟

وقتها رجعنا نتذكر الحلم القديم — الحلم اللي بلّش سنة 2016، واللي توقف قبل ما ياخذ فرصته الحقيقية.

قعدنا مع بعض، حكينا، خططنا، بحثنا، وراجعنا كل إشي. لكن هالمرة كان في فرق كبير: شريف ومحمد صاروا مع بعض، بإيد وحدة، وبخبرات مختلفة، وبنفس الحلم.

قررنا نرجع، مش من نفس النقطة، لكن من الصفر بإمكانيات بسيطة وعقلية مختلفة. أول خطوة كانت إننا نستولي على غرفة من دار شريف ونحولها لمكان شغل! آه، غرفة بالبيت صارت مقر المشروع.

وبشوية المصاري اللي كانت معنا، وشوية أقساط وشكات حملنا حالنا مسؤوليتها، بلّشنا نجهز المكان. اشترينا ماكينات صغيرة على قد إمكانياتنا، ورتبنا الغرفة، وتوكلنا على الله.

ما كان في مستثمرين، ولا تمويل، ولا مكتب فخم، ولا فريق كبير — كان في أخوين، وغرفة، وماكينات بسيطة، وحلم قرروا يعطوه فرصة ثانية.
النظرة

أصعب إشي مش قلة الإمكانيات… أصعب إشي نظرة الناس

من أول يوم، واجهنا أسئلة كثيرة: كيف يعني قاعدين بالبيت وبتشتغلوا؟ وين الشغل؟ كيف مشروع بدون محل؟ هل فعلًا ممكن تنجحوا من غرفة صغيرة؟

بالنسبة لكثير من الناس، الشغل الحقيقي لازم يكون دوام من الساعة 9 للساعة 5، ومكتب أو محل تروح عليه كل يوم. أما إنك تكون قاعد ببيتك، بتصمم وبتطبع وبتصور وبتبيع وبتدير مشروعك، فكان إشي صعب عليهم يتقبلوه.

حتى من الأهل كان في خوف وقلق، مش لأنهم ما بدهم إلنا الخير، لكن لأن الطريق كان مجهول والمخاطرة كبيرة. وكان في ناس بتحبط أكثر ما بتشجع.

بس إحنا كنا شايفين الصورة بطريقة مختلفة.

كنا مؤمنين إنه الشغل مش بالمكان اللي بتشتغل فيه — الشغل باللي بتبنيه، وبالوقت والجهد اللي بتحطه كل يوم. وكان عندنا يقين إنه ربنا رح يكون معنا خطوة بخطوة.
الشغل

من طلبات قليلة… لكل إشي بإيدينا

بالبداية، الوضع ما كان سهل أبدًا. أيام نكون قاعدين بالغرفة، نطلع ببعض، ونحاول نفكر شو ممكن نعمل عشان تتحرك الأمور. كانت الطلبات قليلة، أغلبها من أصحابنا ومعارفنا، وكل طلب كان بالنسبة إلنا إنجاز.

والأصعب إنه كنا إحنا الاثنين نعمل كل إشي! التصوير، التصميم، المونتاج، صناعة المحتوى، الطباعة، الشغل اليدوي، تجهيز الطلبات، الرد على الزباين، متابعة الشحن، والبحث عن منتجات وموردين.

ما كان في شخص مسؤول عن التصوير، ولا مصمم، ولا موظف تغليف، ولا خدمة عملاء — كنا كل هالأشخاص بنفس الوقت!

وبين كل هاد، كانت في رحلة طويلة للبحث عن أفضل الموردين والمصادر، وتجربة منتجات مختلفة، واكتشاف شو بناسب السوق وشو ممكن نقدمه بطريقة مميزة. أكيد غلطنا كثير بالبداية، واتخذنا قرارات تعلمنا منها، وواجهنا مشاكل ما كنا نعرف كيف نحلها.

بس كل غلطة كانت درس، وكل تجربة كانت بتخلينا نفهم شغلنا أكثر.
الفرحة

أول طلب من شخص غريب… فرحة ما بننساها

في لحظات بتكون صغيرة بالنسبة للعالم، لكنها بتضل محفورة بذاكرتك طول العمر. ومن أجمل هاي اللحظات كان أول طلب وصلنا من شخص ما بنعرفه! مش صاحب، ولا قريب، ولا حدا من معارفنا — شخص شاف شغلنا، وعجبه، وقرر يشتري منا.

يمكن ما بتتخيلوا قديش كنا مبسوطين وقتها. كان شعور غريب وحلو، لأنه لأول مرة حسّينا إنه في شخص غريب وثق فينا، واختار يدفع من مصاريه مقابل إشي إحنا صنعناه وجهزناه بإيدينا.

وحتى التوصيل كان قصة لحاله! ما كان عنا شركة توصيل متفقين معها، وضلينا نجرب ونتواصل مع أكثر من شركة لحد ما لقينا شركة مناسبة، نقدر نثق فيها وتحافظ على منتجاتنا لحد ما توصل للزبون.

وشوي شوي، بلشت الناس تعرفنا أكثر، وتتابع شغلنا، وتطلب منا، وتبعتلنا آراء وتجارب جميلة. وكل رسالة حلوة، وكل صورة من زبون، وكل كلمة شكر، كانت تخلينا نحمد ربنا ألف مرة.

النمو

كبرنا شوي… وصار لازم نكبر أحلامنا

مرت الأيام والشهور، وكان في أيام حلوة وأيام صعبة، وليالي طويلة من الشغل والسهر. ومع زيادة الطلبات، عرفنا إنه لازم نطوّر إمكانياتنا.

اشترينا طابعة أكبر، وبلشنا نضيف منتجات جديدة ونجرّب أفكار مختلفة. يمكن بعض المنتجات كانت موجودة بالسوق من قبل، لكن إحنا كنا نحاول نعطيها روح مختلفة من خلال تصاميمنا، وطريقتنا بالتنفيذ، واهتمامنا بالتفاصيل.

لأنه بالنسبة إلنا، مش المهم نبيع منتج وبس — المهم يكون إلنا بصمتنا فيه.

وبعد فترة، قررنا نخوض تجربة جديدة تمامًا: المشاركة في بازار صغير. لأول مرة، انتقلنا من البيع أونلاين إلى البيع وجهًا لوجه. جهزنا زاويتنا البسيطة، وعرضنا منتجاتنا، والتقينا بالناس اللي كانت تشوف شغلنا من خلال الشاشة فقط.

كانت تجربة جميلة ومختلفة، وتعلمنا منها كثير، وعرفتنا أكثر على ذوق الناس واحتياجاتهم.

علامتنا

من الطباعة والهدايا… إلى صناعة منتجاتنا الخاصة

ومع الوقت، صرنا نفكر بخطوة أكبر. ما بدنا نضل بس نختار منتجات موجودة بالسوق ونقدمها بطريقتنا — كان عندنا طموح نعمل إشي يحمل هويتنا الخاصة.

ومن هون إجت فكرة إطلاق منتجات عناية بالجسم خاصة فينا. منتجات برائحة مميزة، وألوان وهوية خاصة، وتصميم وتغليف يحمل اسمنا وبصمتنا.

وبلشت واحدة من أطول وأجمل رحلاتنا. ثلاثة أشهر من البحث والتجهيز والتخطيط والتجارب والتواصل مع الموردين. رحنا أماكن ومدن كثيرة، وبعضها كانت أول مرة نزورها، وقعدنا مع أشخاص بخبرة أكبر منا بسنوات طويلة، ناس بعمر أبونا، عشان نتعلم منهم ونتفق معهم ونوصل للنتيجة اللي بنطمح إلها.

كانت تجربة جديدة علينا بكل تفاصيلها، وفيها كثير تعب وتفكير وتفاصيل صغيرة ما حدا بشوفها.

لكن بالنهاية، وبعد ثلاثة أشهر من الشغل، صار عنا منتجات عناية بالجسم خاصة فينا، برائحة مميزة، وهوية بصرية، وتصميم وتغليف من اختيارنا. والأجمل من كل هاد، إنه الناس اللي جربتها كانت مبسوطة فيها كثير.

وهون حسّينا إننا انتقلنا لمرحلة جديدة؛ مرحلة مش بس بنقدم فيها منتجات، بل بنبني فيها علامة تجارية إلها شخصيتها الخاصة.

واليوم… أنتم جزء من حكايتنا

بعد كل هاي الرحلة، قررنا نعمل خطوة جديدة ونطوّر وجودنا أكثر، ومن هون أطلقنا موقعنا الإلكتروني اللي بتتصفحوه اليوم.

يمكن اللي بتشوفوه قدامكم مجرد موقع ومنتجات وصور، لكن وراء كل تفصيلة في حكاية. وراء كل منتج ساعات من البحث والتجربة والتصميم والتجهيز. وراء كل طلب شخصين اشتغلوا بإيديهم، وتعلموا من أخطائهم، وحاولوا يقدموا الأفضل. وراء كل خطوة غرفة صغيرة، وماكينات بسيطة، وأيام كنا فيها مش عارفين شو رح يصير بكرة.

إحنا مش شركة بلشت كبيرة، ولا كان طريقنا مفروش بالنجاح. إحنا أخوين بلشوا بحلم سنة 2016، توقفوا، كبروا، تعلموا، وخاضوا تجارب كثيرة، ورجعوا سنة 2025 عشان يعطوا هالحلم فرصة حقيقية.

مسفلورا بالنسبة إلنا مش مجرد مشروع طباعة وهدايا — مسفلورا هي كل التعب اللي مرقنا فيه، وكل تجربة علمتنا، وكل خطوة قربتنا من حلمنا.

وشغلة واحدة بنقدر نوعدكم فيها: رح نظل نتعلم، ونجرب، ونتطور، ونقدم كل إشي بنقدر عليه عشان تكون تجربتكم معنا مميزة.

شكرًا لكل شخص دعمنا، واشترى منا، ونصحنا، وشجعنا، وحتى لكل شخص كان جزء من بدايتنا.

لسه الحكاية بأولها… واللي جاي أقوى بإذن الله ❤️

تسوّق قصّتنا بمنتجاتنا

انضم لمجتمع مسفلورا

حساب واحد يفتح كل شيء: نقاط ترجعلك على كل طلب، هدية تسجيل ⁦₪ 10⁩، وتتبّع طلباتك لحظة بلحظة.

أنشئ حسابك مجاناًتصفح المتجر
  • كل المنتجات
  • العروض
  • المفضلة
  • سلة التسوق
  • هدية رقمية
  • دعوة رقمية
  • تتبع طلبك
  • حسابي
متجري متجري
  • تواصل معنا
  • الأسئلة الشائعة
  • سياسة التوصيل
  • سياسة الاسترجاع
  • من نحن
  • المدونة
  • سياسة الخصوصية
  • شروط الاستخدام
متجري © 2026 جميع الحقوق محفوظة صُنع بحب في فلسطين
عروضنا على بريدك أولاً

اشترك بالنشرة وأكّد بريدك — يوصلك رابط يدخّلك لحسابك فوراً مع هدية نقاطك الأولى.

باشتراكك توافق على استقبال رسائلنا الترويجية — يمكنك إلغاء الاشتراك في أي وقت.

الرئيسيةالمتجرسلة التسوقالمفضلة0تتبع طلبكاطلب شيء مخصصبحثالمدونةمن أعمالناآراء العملاءقصتناحسابيتواصل معنا
معلومات المتجر
من نحنالأسئلة الشائعةسياسة الخصوصيةشروط الاستخدامسياسة التوصيلسياسة الاسترجاع
المتجر هدايا ساس
بحث
    المساعدة والتواصل
    أنشئ هدية رقمية تواصل معنا
    تفضيلات المستخدم
    0المفضلة المتجر 0سلة التسوق حسابي